Hörð gagnrýni á AGS frá endurskoðendum sjóðsins

Sjálfstæðir endurskoðendur/matsmenn (IEO) Alþjóðagjaldeyrissjóðsins (AGS) gagnrýna sjóðinn harðlega fyrir að hafa ekki séð fjármálakreppuna fyrir árið 2007. Meðal annars er gagnrýnt að í skýrslu sinni um Ísland árið 2007 hafi AGS ekki einbeitt sér að þeirri staðreynd að stærð bankakerfis landsins var orðin 1.000% af landsframleiðslu þess.

Fjallað er um málið í Guardian en IEO hafa sent frá sér 50 síðan skýrslu um frammistöðu AGS í undanfara kreppunnar. Þar kemur m.a. fram að sjóðurinn hafi dregið úr þeirri áhættu sem var til staðar og fagnað léttvægu eftirliti með fjármálamörkuðum.

Dominique Strauss-Khan forstjóri AGS segir það auðmýkjandi fyrir sjóðinn að hafa ekki varað fyrr við því ástandi sem var að skapast. Strauss-Khan var ekki orðinn forstjóri sjóðins þau ár, 2004 til 2007, sem skýrslan nær yfir. Hann segir að síðan þá hafi ýmisar mikilvægar endurbætur orðið á starfsemi sjóðsins og komið hafi verið á fót kerfi sem gerir sjóðnum auðveldara með að meta áhættur fyrr en áður.

Hvað varðar eftirlit með fjármálamörkuðum kemur fram að AGS var mjög hrifinn af þeirri stefnu sem Bandaríkjamenn höfðu um að markaðirnir ættu meir og minna að sinna sjálfir sínum eftirlitsstörfum. AGS boðaði m.a. að aðrar þjóðir ættu að taka Bandaríkin sér til fyrirmyndar í þessum efnum.