Brady valinn bestur í NFL-deildinni

Tom Brady, leikstjórnandi New England Patriots, var í dag krýndur besti leikmaður NFL-deildarinnar í ár. Það sem meira er þá fékk hann atkvæði allra í fyrsta sætið en slíkt hefur ekki gerst áður.

Brady var ekki fjarri því að fá öll 50 atkvæðin árið 2007. Þá fékk hann 49 en einn kosningabær aðili kaus Brett Favre.

"Það er alltaf mikill heiður að fá svona verðlaun. Enginn fær þó svona verðlaun nema vera vel studdur af góðum liðsfélögum," sagði Brady auðmjúkur.

Hann fór á kostum í vetur og margir áttu von á því að hann færi með Patriots alla leið í vetur. Liðið tapaði síðan mjög óvænt fyrir NY Jets í úrslitakeppninni.