Topptilþrif frá þeim stigahæsta í deildinni - myndband

Haukamaðurinn Semaj Inge er stigahæsti leikmaður Iceland Express deildarinnar í körfubolta en hann hefur skorað 23,3 stig að meðaltali í leik það sem af er í vetur. Semaj er mikill tilþrifakarl eins og sást vel í síðsta leik Hauka á móti Keflavík.

Strákarnir á Haukar TV hafa tekið saman skemmtilegt myndband með tveimur frábærum tilþrifum Semaj í leiknum þar sem hann sést skora fjögur af 32 stigum sínum.

Í því fyrra skorar hann á ótrúlegan hátt aftur fyrir sig í engu jafnvægi en í því síðara treður hann boltann í körfuna í hraðaupphlaupi. Þetta er ekki fyrsta troðsla Semaj í vetur og örugglega ekki sú síðasta.

Semaj hefur annars verið að hækka meðalskor sitt í febrúar þar sem hann er búinn að skora 27,3 stig að meðaltali í þremur leikjum auk þess að taka 10,3 fráköst og gefa 5,7 stoðsendingar í leik. Ekki slæmur mánuður hjá kappanum.