NIB eykur lánveitingar sínar um 95 milljarða

Norræni fjárfestingarbankinn (NIB) ætlar að auka lánveitingar sínar á næstunni um 500 milljónir evra eða tæplega 95 milljarða króna.

Í tilkynningu frá bankanum segir að þessi lán eigi að vega upp á móti því frosti sem komið er á lánveitingar evrópska banka vegna skuldakreppunnar á evrusvæðinu.

Settur verður upp nýr sjóður hjá NIB og þessari fjárhæð dreift í gegnum hann. Fjárhæðinni er einkum ætlað að mæta endurfjármögnunarþörf þeirra viðskiptavina bankans sem nýlega hafa lokið verkefnum en eiga erfitt með að fá fjármagn frá almennum bönkum.

Í frétt um málið á Bloomberg segir að þar að auki ætli NIB að auka sölu sína á skuldabréfum um 17% á næsta ári þannig að útgáfan nemi 3,5 milljörðum evra. Þetta er gert til að mæta aukinni eftirspurn frá seðlabönkum og fjármálastofnunum eftir auðseldum eignum sem hafa lánshæfiseinkuninna AAA.