Bretar einir fyrir utan

Bretar eru nú eina þjóðin í Evrópusambandinu sem ekki er aðili að samkomulagi um aðgerðir til þess að sporna gegn skuldavanda í Evrópu. Bretar beittu neitunarvaldi þegar breytingar á sáttmála sambandsins voru til umræðu.

Fyrr í dag var greint frá því að Ungverjar ætluðu heldur ekki að vera með en nú er komið í ljós að þeir ætla að láta þjóðþing sitt kjósa um málið. Það ætla Svíar og Tékkar einnig að gera. Samkomulagið náðist í morgun á fundi leiðtoga Evrópuríkja í Brussell.

Í samkomulaginu felst að Evrópusambandsríkin skuldbinda sig til þess að halda sig inn ramma sem sambandið setur hverri þjóð, þegar kemur að ríkisútgjöldum. Þá verður einnig innleidd heimild til þess að refsa þeim þjóðum sem ekki standast regluverk sambandsins.

David Cameron forsætisráðherra Bretlands segist hafa haft hagsmuni Bretlands að leiðarljósi þegar hann ákvað að þjóð hans yrði ekki aðili að samkomulaginu.