Grindvíkingar lentu í vandræðum í Grafarvoginum

Grindvíkingar lentu í vandræðum með Fjölni í Grafarvogi í kvöld í fimmtu umferð Lengjubikars karla í körfubolta en unnu að lokum 83-78 sigur. Grindavík var með tíu stiga forskot í hálfleik en Fjölnir kom sér aftur inn í leikinn með því að vinna þriðja leikhlutann 20-9.

Grindavík var búið að vinna B-riðilinn og tryggja sér sæti í undanúrslitunum fyrir þennan leik þar sem að Haukar töpuðu á Ísafirði í gærkvöldi. Grindvíkingar hafa unnið alla tólf leiki sína í vetur og eru líka á toppi Iceland Express deildar karla.

Grindvíkingar breyttu stöðunni úr 16-16 í 23-16 og voru 26-19 yfir eftir fyrsta leikhlutann. Grindavík komst síðan í 28-19 í upphafi annars leikhluta en í stað þess að stinga Fjölnisliðið af þá tókst Fjölnismönnum að minnka aftur muninn. Grindavík hleypti þeim þó ekki of nálægt og var á endanum komið með tíu stiga forskot í hálfleik, 48-38.

Fjölnismenn byrjuðu seinni hálfleikinn af miklum krafti, unnu fyrstu sex mínútur þriðja hlutans 18-6 og komust fyrir vikið yfir í 56-54. Árni Ragnarsson skoraði átta stig á þessum kafla. Fjölnir var síðan 58-57 yfir fyrir lokaleikhlutann en Grindavík skoraði aðeins níu stig í þriðja leikhlutanum.

Leikurinn hélst jafn í fjórða leikhlutanum þar til að Grindavík náði góðum spretti og komst yfir í 75-69. Fjölnir minnkaði muninn aftur í þrjú stig en Grindavík var 79-74 þegar rúm mínúta var eftir. Grindvíkingar héngu á forskotinu og unnu sinn fimmta sigur í röð í Lengjubikarnum.



Lengjubikar karlar, B-riðill

Fjölnir-Grindavík 78-83 (19-26, 19-22, 20-9, 20-26)

Fjölnir: Calvin O'Neal 30/9 fráköst, Nathan Walkup 20/9 fráköst, Árni Ragnarsson 15/5 fráköst, Arnþór Freyr Guðmundsson 9/4 fráköst, Jón Sverrisson 2/7 fráköst, Björgvin Hafþór Ríkharðsson 2.

Grindavík: Giordan Watson 19, J'Nathan Bullock 18/6 fráköst, Sigurður Gunnar Þorsteinsson 13/7 fráköst, Páll Axel Vilbergsson 7/7 fráköst, Jóhann Árni Ólafsson 7, Björn Steinar Brynjólfsson 6, Ólafur Ólafsson 6, Þorleifur Ólafsson 4, Þorsteinn Finnbogason 3.