AC Milan byrjað að tala við umboðsmann Tevez

Ítalskir fjölmiðlar hafa heimildir fyrir því að forráðamenn AC Milan séu farnir að vinna markvisst að því fá Carlos Tevez til liðsins eftir áramót. Tevez hefur skrópað á allar æfingar hjá Manchester City að undanförnu og heldur sig hjá fjölskyldu sinni í Argentínu.

Kia Joorabchian, umboðsmaður  Carlos Tevez, hitti Adriano Galliani, framkvæmdastjóra AC Milan í dag og þar hafa þeir væntanlega rætt samning Tevez sem er svo eins og flestir vita vanur því að vera á ofurlaunum.

Tevez heimtaði að vera seldur síðasta sumar og neitaði síðan að hita upp fyrir Meistaradeildarleik á móti Bayern München í lok september. Argentínski framherjinn sem var fyrirliði City á síðasta tímabili, hefur ekki spilað með Manchester City síðan allt fór á annan endann í München.

AC Milan er að leita að manni fyrir ítalska landsliðsmanninn Antonio Cassano sem þurfti að gangast undir hjartaaðferð á dögunum og verður ekkert meira með á tímabilinu.

Manchester City mun örugglega selja Carlos Tevez í janúar enda í góðum málum með þá Edin Dzeko, Mario Balotelli, Sergio Aguero og David Silva í flottu formi.