Grosjean fær tækifæri á æfingum með Renault

Heimsmeistarinn í GP 2 mótaröðinni 2011, Romain Grosjean mun aka með Renault liðinu á föstudagsæfingu í þeim tveimur Formúlu 1 mótum sem eftir eru. Næsta mót er í Abú Dabí um næstu helgi. Grosjean er varaökumaður Renault liðsins, en Bruno Senna og Vitaly Petrov eru aðalökumenn þess.

Enn er óljóst hvort Robert Kubica getur keppt með Renault liðinu á næsta ári, en hann hefur verið í endurhæfingu eftir að hann meiddist í rallkeppni s.l. vetur og Renault liðið er að skoða möguleika sína hvað ökumenn varðar fyrir næsta ár. Grosejan ók með Renault í sjö Formúlu 1 mótum árið 2009 og þekkir því vel til starfa liðsins.

„Reynslan árið 2009 var frábær. Að aka í sjö mótum með Fernando (Alonso) var mikil reynsla, en það voru líka erfiðir tímar. En þetta gerði mig sterkari og gerði mig af því sem ég er í dag. Tímabilið í GP2 mótaröðinni hefur verið gott og ég hef bætt mig þar sem ég var ekki eins öflugur og ég vildi. Ég er viss um að ég mun sjá hlutina í öðru ljósi þegar ég sest aftur um borð í Formúlu 1 bíl," sagði Grosejan í frétt á autosport.com.

Grosjean telur að andrúmsloftið innan Renault liðsins sé betra núna en það var 2009 og veit að æfingar hans með Renault eru liður í því að liðið er að skoða ökumenn fyrir 2012, samkvæmt því sem segir í frétt autosport.com.

„Í hvert skipti sem ég sest í bíl, þá er það próf, jafnvel fyrir reynda ökumenn. Maður verður að gera sitt besta og liðið mun skoða hvað ég er að gera. En ég kann við álagið, þannig að það er í lagi," sagði Grosejan.

Hann sagðist að allt Renault liðið vonaðist til að Kubica braggaðist vel og óljóst væri með hans eigin framtíð, en Grosjean sagðist verið í viðræðum við nokkur lið og málið væri að vera þolinmóður.