Fjárfestar bíða eftir neyðaráætlun ESB

Fjárfestar bíða þess að áætlun sem ætlað er að hamla gegn skuldavanda í Evrópu verði gerð opinber en reiknað er með því að það gerist nk. miðvikudag. Á vefsíðu breska ríkisútvarpsins BBC kemur fram að hlutabréfaviðskipti síðustu daga og vikna hafa borið þess merki að fjárfestar vilji stíga varlega til jarðar þar til ljóst er hvað ríki á evrusvæðinu ætla að gera.

Þrátt fyrir stíf fundarhöld evrópskra þjóðhöfðingja í Brussell um helgina hefur enn ekki náðst niðurstaða um hversu stór björgunarsjóður ESB á að vera. Á blaðamannafundum hafa leiðtogar Evrópuríkja sagt að mikill árangur hafi náðst og aðeins sé tímaspursmál hvenær hægt verður að bregðast við vandanum með ítarlegri áætlun sem allir geti sætt sig við.

Þrátt fyrir að sátt sé í augsýn um til hvaða aðgerða skuli grípa er fyrirsjáanlegt að mikill skuldavandi ríkja og fjármálastofnana verði ekki leystur með skammtímaaðgerðum.