Levante enn á toppnum - öruggt hjá Real Madrid

Topplið spænska boltans, Levante, gefur ekkert eftir og vann í kvöld flottan 3-2 sigur á Real Sociedad. Real Madrid vann auðveldan sigur á Villarreal.

Victoriano Nani, Valdo og Ruben Estrada skoruðu mörk Levant í kvöld og sigurmarkið hjá Estrada kom þegar þrjár mínútur voru komnar fram yfir venjulegan leiktíma. Gríðarleg seigla.

Karim Benzema, Kaká og Angel di Maria skoruðu síðan mörk Real Madrid sem vann Villarreal, 3-0.

Levante er með 23 stig á toppnum, Real er með 22 og Barcelona 21.