Horner: Árið hefur verið magnað

Christian Horner, yfirmaður Formúlu 1 liðs Red Bull, segir að markmið liðsins sé að tryggja liðinu meistaratitil bílsmiða í framhaldinu af því að Sebastian Vettel ökumaður liðsins tryggði sér titil ökumanna í gær. Yngstur allra til að vinna tvo meistaratitla í röð, eftir að hafa orðið yngsti meistari sögunnar í fyrra.

Vettel hefur unnið níu mót á árinu og hefur ellefu sinnum verið fremstur á ráslínu. Horner telur að Vettel muni leita til að gera enn betur í framtíðinni.

„Það verður erfitt fyrir hann að gera betur, en hann hefur gert í ár, en ef ég þekki Sebastian rétt, þá mun hann alltaf leita leiða til að bæta sig. Það gerir hann að svona öflugum ökumanni," sagði Horner í frétt á autosport.com í dag.

Red Bull er með 130 stiga forskot í stigamóti bílasmiða, þegar fjórum mótum er ólokið í Formúlu 1 á keppnistímabilinu. Horner segir það megin markmið Red Bull að tryggja liðinu þann titil. Næsta mót er í Suður Kóreu um næstu helgi.

„Ég tel að meginmarkiðið núna sé að ná að vinna titil bílsmiða, en vitanlega eru nokkur met í boði, sérstaklega fyrir Sebastian. En ég er viss um að hann mun einbeita sér að því að hjálpa liðinu að vinna titil bílasmiða. En ég er viss um að hann hefur augastað, að hluta til á að jafna einhver met."

„Árið hefur verið magnað, árið í fyrra var það líka og árið 2009 var frábært. Fólkið innan liðsins hefur unnið saman á einstæðan hátt. Það sýndi sig í verki um helgina hvað það er mikil ástríða innan liðsins," sagði Horner, en lið hans brást vasklega við þegar framvængur á bíl Vettel skemmdist á föstudagsæfingu.

Nýr framvængur var útbúinn í bækistöð liðsins í Englandi og sendur með flugi til Japan og svo með þyrlu á mótsstað. Vængurinn var kominn þangað hálftíma fyrir tímatökuna á laugardag. Í framhaldinu náði Vettel náði besta tíma í tímatökunni.

Horner segir að liðið muni leita eftir því að frammistaða liðsins verði sú sama og áður og að nálgun liðsins í mótum verði sú sama fram yfir síðasta mót ársins í Brasilíu.

„Það er forgangsverkefni að Mark náð öðru sæti í stigamóti ökumanna og ljúki tímabilinu á góðum nótum. Það sem við lærum á þessu ári, verður notað í bíl næsta árs," sagði Horner og minntist á að liðið myndi nýta tækifærið í næstu mótum að prófa hluti sem gætu komið að notum á næsta ári.