Besta byrjun Lions síðan 1956

Ótrúlegt gengi Detroit Lions í NFL-deildinni hélt áfram í nótt. Liðið vann þá sinn fimmta leik í röð og komst í 5-0 í fyrsta skipti síðan 1956. Lions lagði nágranna sína í Chicago Bears í nótt, 24-13.

Aðeins Detroit og Green Bay Packers hafa unnið alla fimm leiki sína í deildinni. Gott gengi Packers kemur engum á óvart en þessi byrjun hjá Lions er óvænt enda verið eitt lélegasta lið deildarinnar um árabil.

Útherji Detroit, Calvin Johnson, er að eiga lygilegt tímabil en hann skoraði sitt níunda snertimark í nótt sem er met. Haldi hann svona áfram mun hann slá met Randy Moss sem skoraði 23 snertimörk á einu tímabili.