Umfjöllun: Íslandsmeistararnir byrja á sigri gegn nýliðunum

KR vann nokkuð sannfærandi sigur gegn Þór frá Þorlákshöfn 90-84 í DHL-höllinni í kvöld, en þetta var fyrsti leikur beggja liða í Iceland-Express deild karla á tímabilinu. Mikill haustbragur var á leik liðanna og greinilegt að þau eru ekki komin í nægilega góða leikæfingu. Nýliðarnir frá Þorlákshöfn stóðu samt vel í KR-ingunum allan leikinn og fá hrós fyrir það.

Þór frá Þorlákshöfn byrjaði leikinn af miklum krafti og skoruðu nokkrar fínar körfur í byrjun fyrsta leikhluta, en staðan var 7-5 eftir þriggja mínútna leik. Þá fóru Íslandsmeistararnir í gang ok breyttu stöðunni í 16-10, en liðið keyrði hratt í bakið á Þór og náðu í nokkrar auðveldar körfur. Þórsarar voru heldur betur ekki af baki dottnir en þeir skoruðu 15 stig gegn tveimur á næstu mínútum og breytu stöðunni í 25-22 fyrir gestina. Staðan var 25-24 eftir fyrsta fjórðunginn.

Þórsarar héldu áfram uppteknum hætti í byrjun annars leikhluta og komust í 30-26, en þá fór KR-vélin aftur í gang og Hreggviður Magnússon fór að setja niður þriggja stiga skotin. KR náði að snúa leiknum sér í vil og komst í 34-32 þegar fjórðungurinn var hálfnaður. KR-ingar héldu áfram að keyra upp hraðan og létu Þórsara heldur betur finna fyrir því. Staðan var 48-42 fyrir KR í hálfleik.

Þriðji leikhlutinn var nokkuð jafn en og sami munur hélst á með liðinum nánast allan fjórðunginn, en staðan var 63-57 fyrir KR þegar 3 mínútur voru eftir af leikhlutanum. Svipaður munur var á með liðinum næstu mínútur og var staðan var 68-60 fyrir lokafjórðunginn.

Þórsarar byrjuðu fjórða leikhlutann virkilega vel og minnkuðu strax muninn niður í tvö stig, 69-67, og mikil spenna komin í DHL-höllina. Þegar fjórar mínútur voru eftir af leiknum var staðan 77-75 fyrir KR. Nokkrir umdeildir dómar féllu gegn Þór í lokin og var erfitt fyrir þá að koma til baka eftir það. Leiknum lauk með sigri KR 90-84. Mikilvægur sigur fyrir meistarana en þeir verða að bæta leik sinn mikið fyrir komandi átök.

Edward Lee Horton Jr. var atkvæðamestur í liði KR með 26 stig en Darrin Govens gerði 30 stig fyrir Þór í leiknum.

KR- Þór  90-84 (24-25, 24-17, 20-18,22-24)

KR: Edward Lee Horton Jr. 24/5 fráköst/ 4 stoðsendingar, David Tairu 21/5 fráköst, Hreggviður Magnússon 15/8 fráköst, Finnur Atli Magnusson 15/ 5 fráköst, Emil Þór Jóhannsson 9/ 4 fráköst, Skarphéðinn Freyr Ingason 5, Jón Orri Kristjánsson 1.

Þór Þorlákshöfn: Darrin Govens 28/10 fráköst, Michael Ringgold 22/15 fráköst, Guðmundur Jónsson 13, Darri Hilmarsson 12/5 fráköst, Grétar Ingi Erlendsson 7, Þorsteinn Már Ragnarsson 2.