Umfjöllun: Njarðvíkingar sýndu klærnar í Ljónagryfjunni

Njarðvík byrjar tímabilið í Iceland Express-deild karla vel en í kvöld vann liðið sigur á Haukum, 107-91. Njarðvíkingum var reyndar spáð falli úr deildinni fyrir tímabilið en þeir hafa svarað því með því að vinna fyrstu tvo leiki tímabilsins.

Leikurinn var frekar jafn til að byrja með og skiptust liðin á því að leiða leikinn - staðan eftir fyrsta fjórðung var 27-28, Haukum í vil. Í upphafi annars leikhluta hófu Njarðvíkingar leik sinn á svæðispressu og virtist taugatitringur koma í Haukana sem töpuðu boltanum strax í fyrstu sókn sinni. Um miðbik fjórðungsins fóru Njarðvíkingar í svæðisvörn en það stoppaði ekki Hafnfirðinga sem skoruðu nokkrar mikilvægar körfur. Emil Barja kom inn á liði Hauka og setti niður mikilvæga körfu í fyrstu sókn sinni og svo þrist stuttu síðar.

Elvar Már Friðriksson, leikstjórnandi Njarðvíkur, sótti nokkrar villur þegar hann keyrði á vörn Haukana sem virtust ekki ráða við hraðann á honum. Njarðvíkingar skoruðu nokkrar mikilvægar körfur undir körfunni með Cameron Echols Í broddi fylkingar. Njarðvíkingar voru komnir í bónus og þegar tvær mínútur voru eftir var munurinn orðinn 9 stig, Njarðvíkingum í vil.

Ólafur Helgi Jónsson setti svo niður rándýran þrist og munurinn orðinn 12 stig. Pétur Ingvarsson, þjálfari Hauka tók þá leikhlé en áður en hann messaði yfir liði sínu átti hann gott spjall við dómarana en hann vildi eflaust fá villu í sókninni á undan. Þegar flautað var til hálfleiks var staðan 58–48 fyrir Njarðvík og Cameron Echols stigahæstur Njarðvíkinga með 19 stig en hjá Haukum var Jovonni Shuler atkvæðamestur með 12 stig.

Njarðvíkingar mættu gríðarlega einbeittir til leiks í síðari hálfleikinn og settu Cameron, Elvar Már og Ólafur Helgi rándýra þrista niður. Ekkert gekk upp hjá Haukunum sem töpuðu boltanum í hverri sókn. Elvar Már setti svo eina rándýra þriggja stiga körfu og strax í næstu sókn stálu þeir boltanum og Travis Holmes keyrði upp völlinn og tróð boltanum ofan í körfuna af miklum krafti. Áhorfendur stóðu upp og Pétur, þjálfari Hauka, tók leikhlé. Munurinn orðinn 23 stig og nokkuð ljóst að Hafnfirðingarnir voru ekki mættir í síðari hálfleikinn.

Haukarnir fóru í svæðisvörn eftir leikhléið sem Njarðvíkingar réðu lítið við. Gestirnir náðu að minnka forskotið örlítið en þeir réðu ekkert við Cameron undir körfunni sem og Elvar Má og Ólaf Helga sem settu niður nokkra mikilvæga þrista. Haukarnir voru engan veginn tilbúnir í síðari hálfleikinn og náðu aldrei að gera atlögu að Njarðvíkingunum það sem eftir lifði leiks.

Í fjórða leikhluta hélt veislan áfram og komu Hafnfirðingar engum vörnum við leik Njarðvíkinga sem voru í banastuði með góðum stuðningi áhorfenda. Þegar flautað var til leiksloka var staðan 107–91 og nokkuð sannfærandi sigur Njarðvíkinga staðreynd.

Njarðvík-Haukar 107-91 (27-28, 31-20, 29-22, 20-21)

Njarðvík: Cameron Echols 40/16 fráköst, Elvar Már Friðriksson 22/5 stoðsendingar, Travis Holmes 21/4 fráköst/6 stolnir, Ólafur Helgi Jónsson 18, Rúnar Ingi Erlingsson 4, Óli Ragnar Alexandersson 2.

Haukar: Jovanni Shuler 30/10 fráköst, Örn Sigurðarson 14, Davíð Páll Hermannsson 12, Sævar Ingi Haraldsson 12, Emil Barja 9, Helgi Björn Einarsson 6/7 fráköst, Andri Freysson 4, Sveinn Ómar Sveinsson 3/7 fráköst, Haukur Óskarsson 1.