Niðursveifla á hlutabréfamörkuðum

Hlutabréfamarkaðir halda áfram á niðurleið frá síðustu viku, um leið og óttinn vegna skuldavanda Spánar og Ítalíu hefur fengið byr undir báða vængi. Evrópski hlutabréfamarkaðurinn féll um nærri fjögur prósent við opnun markaða í morgun.

Þýska DAX vísitalan féll um 3.8 prósent við opnun markaða á meðan franska CAC 40 vísitalan féll um 3.7 prósent. FTSE 100 vísitalan féll minnst í samanburðinum eða um 2.3 prósent. Markaðir í Asíu urðu einnig fyrir niðursveiflu en Nikkei vísitalan í Tókýó hafði fallið um 1.9 prósent undir lok markaða og Hang Seng vísitalan í Hong Kong hafði fallið um 3 prósent.

Þessi markaðsniðursveifla hófst síðastliðinn fimmtudag á mörkuðum í New York og er talið að vísbendingar um að farið sé að hægjast á alþjóðlega hagkerfinu sé ástæðan, auk þess sem óttinn við niðurskurð yfirvalda í bæði Evrópu og Bandaríkjunum er farinn að gera vart við sig. Fjárfestar óttast í auknum mæli að lítil bót verði ráðin á skuldavanda Evrópu, ekki síst eftir að flokkur Angelu Merkel, kanslara Þýskalands, tapaði kosningum í sínu heimafylki. Einnig hafa komið upp vandræði í samstarfi Alþjóðagjaldeyrissjóðsins og Evrópusambandsins við grísk stjórnvöld við að taka á skuldavanda gríska ríkisins og ítölskum stjórnvöldum virðist ganga illa að standa við niðurskurð í ríkisfjármálum.

Bankahlutabréf hafa tekið hitann og þungann af þessari niðursveiflu. Hlutabréf í konunglega skoska bankanum féllu um 10 prósent, Deutsche Bank um 8.2 prósent og Societe Generale um 8.5 prósent.