Baldur: Vöknuðu af værum blundi

Allt útlit er fyrir að kvennalið Stjörnunnar í handknattleik verði með í N1-deild kvenna í vetur. Formaður og varaformaður handknattleiksdeildar félagsins sögðu af sér í gær.

Þetta segir Baldur Ó. Svavarsson, fráfarandi formaður deildarinnar, í samtali við Vísi. Hann, ásamt stjórn deildarinnar, sendi frá sér yfirlýsingu í fyrradag þar sem því er lýst yfir að Stjarnan muni draga lið sitt úr keppni í N1-deild kvenna.

„Þetta vakti menn af værum blundi hér í bænum," sagði Baldur. „Maður leikur sér þó ekki að því að gera svona lagað. Og þetta var ekki gert í þeim tilgangi að vekja menn til lífsins. En þetta varð engu að síður til þess að stuðningsmenn, aðalstjórn félagsins og stjórnmálamenn tóku við sér. Menn voru á fundum og í símum í allan gærdag," segir hann og rekur nú atburði gærdagsins.

Sendum boltann yfir á aðalstjórnina

„Aðalstjórn Stjörnunnar fundaði með bæjarstjórninni í gær, allavega formaðurinn. Síðan voru hringingar og fundir allan daginn. Við í stjörn handknattleiksdeildarinnar funduðum klukan 17.30 og fórum yfir stöðuna. Á sama tíma fundaði aðalstjórn félagsins."

„Stuttu síðar vorum við, ég og varaformaðurinn Ragnheiður Traustadóttir, beðin um að mæta á fund til aðalstjórnar. Þar skiluðum við inn umboði okkar sem stjórnarmenn og gáfum boltann yfir til aðalstjórnar."

„Aðalstjórnin setti svo saman bráðabirgðastjórn og tók varaformaðurinn, Sigurður Bjarnason, tímabundið við formennsku í handknattleiksdeild. Við fórum svo á fund með þeim og leikmönnum í Mýrinni þar sem þetta var tilkynnt."

„Svo hófst umræða um hvort starfið ætti að halda áfram og hvort liðið ætti að keppa í vetur. Það var mikill vilji til þess, þó svo að skýr niðurstaða hafi ekki fengist. En ég tel að það sé yfirlýsing væntanleg þess efnis í dag."

„En það er alveg ljóst að nú er búið að berja í brestina og menn voru einhuga um að láta þetta ekki fara svona. Það verður því spilað í vetur."

Var algert neyðarúrræði

Hann segir að það hafi ekki verið tilgangurinn að nota fjölmiðla til að vekja athygli á stöðu kvennaliðs Stjörnunnar. Það hafi hins vegar skilað sínu en um algert neyðarúrræði hafi verið að ræða.

„Við vildum að þetta kæmi skýrt fram. Að það yrði ekki pískrað um þetta. Að það yrði ekki farið í felur með þetta - enda væri þetta það alvarlegt mál. Viðbrögðin yrðu að vera snör. Leikmennirnir þurfa sinn undirbúning áður en tímabilið hefst og það var einfaldlega ekki lengur hægt að sitja endalausa fundi og bíða. Það verður að taka ákvörðun."

Töluðum lengi fyrir daufum eyrum

Baldur segir að bæði hann og þeir sem sitja í meistaraflokksráði kvenna hafi talað fyrir daufum eyrum lengi - bæði gagnvart aðalstjórninni og bæjaryfirvöldum.

„Þeir og við höfum gert þessum aðilum ítrekað grein fyrir því að þessi niðurskurður á afreksstarfinu sem hefur átt sér stað hefur gert líf okkar mjög erfitt. Og í raun eru þeir í meistaraflokksráði ósáttir við þessi málalok."

„Þeir eiga eflaust eftir að láta í sér heyra. Þeir vilja að það sé tekin skýrari afstaða til þessa máls. Þetta eru afar metnaðarfullir menn sem eiga ekki síst stóran þátt í þeim árangri sem hefur náðst á undanförnum árum. Þeir vilja að enn meiri peningur verði sett í þetta afreksstarf - að það verði settur sá peningur í sem reksturinn kostar. Þeir vilja ekki halda úti miðlungsliði enda er metnaður þeirra meiri en svo."

Vilji leikmanna skiptir öllu máli

Nú hefur verið skipt út formanni í meistaraflokksráði kvenna og reyndar karla líka, segir Baldur. En hann segir að það sem mestu hafi skipt í öllu þessu er vilji leikmanna til að halda áfram.

„Lykilleikmenn gáfu það út að þeir myndu vera áfram. Það er það sem er algjört lykilatriði. Þetta er fyrst og fremst spurningin um hvað þær vilja. Og þær voru tilbúnir að láta á þetta reyna."

Florentina Stanciu, markvörður, gekk til liðs við ÍBV fyrir skömmu og átti það stóran þátt í því að ákveðið var í fyrradag að hætta öllu saman. „Nú er verið að leita að markverði og öðrum leikmönnum reyndar líka. Það vantar enn leikmenn til að vera með fullan varamannabekk."

„En það voru allir sammála um að láta reyna á þetta og spila. Það var einhugur um það."