Chivas fór létt með Barcelona

Barcelona tapaði í nótt fyrir mexíkóska liðinu Chivas, 4-1, í æfingaleik í nótt en leikurinn fór fram á heimavelli bandaríska NFL-liðsins Miami Dolphins fyrir framan rúmlega 70 þúsund áhorfendur.

David Villa kom reyndar Börsungum yfir strax á þriðju mínútu og reyndist það eina mark fyrri hálfleiksins. En Chivas skoraði svo þrívegis á tólf mínútna kafla í upphafi síðari hálfleiks sem gerði út um leikinn.

Marco Fabian skoraði tvö markanna en þeir Omar Arello og Jose Luis Verduzco hin mörk Chivas.

Barcelona tapaði fyrir Manchester United í æfingaleik um síðustu helgi en liðið er án þeirra Lionel Messi, Daniel Alves, Javier Mascherano og Alexis Sanchez sem allir kepptu í Copa America fyrr í sumar.

Börsungar mæta næst öðru mexíkósku liði, America, en í þetta sinn í Dallas.