Silverstone breytt fyrir tæpa 5.2 miljarða

Silverstone brautarstæðinu í Bretlandi hefur verið breytt fyrir 28 miljónir sterlingspunda á milli ára, eða fyrir 5.196 milljarða íslenskra króna. Búið er að reisa ný mannvirki fyrir aðstöðu keppnisliða, sem verður notuð í fyrsta skipti af Formúlu 1 liðum í breska kappakstrinum um helgina.

 

Sjálfri brautinni hefur ekki verið breytt samkvæmt fréttatilkynningu frá FIA, en þó er búið að færa rásmark og endamark á nýtt svæði við beinan kafla sem kallast Wellington. Brautin er sem fyrr 5.891 km að lengd og verða eknir 52 hringir um hana á sunnudaginn í breska kappakstrinum.

Sex fyrrum sigurvegarar í Formúlu 1 á Silverstone brautinni keppa um helgina, þetta eru: Michael Schumacher ( sem vann 1998, 2002, 2004); Rubens Barrichello (2003); Fernando Alonso (2006); Lewis Hamilton (2008); Sebastian Vettel (2009)og Mark Webber (2010).

Breski kappaksturinn hefur verið á dagskrá frá árinu 1950, en fyrsta Formúlu 1 mótið fór fram á Silverstone 13. maí árið 1950, en samtals hafa þrjú mótssvæði verið notuð fyrir breska mótið frá upphafi. Breski kappaksturinn er heimavöllur fyrir átta Formúlu 1 lið.