Real Madrid að kaupa átján ára varnarmann

Real Madrid er enn að styrkja sig fyrir næstu leiktíð en franska félagið Lens tilkynnti í dag að varnarmaðurinn Raphael Varane er á leið til Real.

Varane er aðeins átján ára gamall og var einnig sterklega orðaður við Paris St. Germain og Manchester United.

„Varane er knattspyrnuundur og mun spila hjá Real Madrid undir stjórn Jose Mourinho,“ sagði Gervais Martel, forseti Lens, í gær. „Real hefur verið að eltast við hann undanfarinn einn og hálfa mánuð. Í síðustu viku fór hann til Madrídar þar sem Mourinho og Zinedine Zidane tóku á móti honum. Hvernig getur átján ára drengur hafnað því?“

„Þetta snerist ekki um peninga fyrir okkur. Lens hefði fengið meira ef hann hefði farið til Englands en ég verð að hafa í huga að ferill leikmannsins skiptir líka máli. Real er að taka þátt í mörgum keppnum og ég er viss um að hann muni fá tækifæri til að spila.“

Varane var fastamaður í liði Lens á síðasta tímabili. Hann lék alls 23 leiki og skoraði í þeim tvö mörk.