Vettel: Við erum tilbúnir að berjast

Sebastian Vettel hjá Red Bull verður fremstur á ráslínu í kanadíska kappakstrinum í Montreal á morgun. Fyrirfram var ekki talið að bíll hans yrði sá öflugasti á Gilles Villeneuve brautinni, en það reyndist staðreynd í sjöttu tímatökunni af sjö á þessu ári.

„Við höfum bætt okkur frá því í fyrra. Þá vorum við með aðra keppnisáætlun og ég fórnaði tímatökunni. En í ár líður mér nokkuð þægilega hérna", sagði Vettel á fréttamannafundi eftir tímatökuna. Lewis Hamilton vann mótið í Kanada í fyrra og er í öðru sæti í stigamóti ökumanna á eftir Vettel.

Vettel keyrði á varnarvegg á fyrstu æfingunni á föstudag, sem varð til þess að bíllinn skemmdist verulega. En hann ók síðan á seinni æfingu dagsins og taldi æfingatímann mikilvægan, en hann æfði líka í dag áður en tímatakan fór fram.

„Þetta er erfið braut, með köntum og hægum beygjum sem þarf að læra inn, eftir að hafa verið á mikilli ferð. Það þarf að bremsa af hörku, en tímatakan gekk snuðrulaust."

„Stóra stundun er á morgun og aðstæður breytast að öllum líkindum og það gæti rignt eitthvað. Spurningin er hvenær og hve mikið. Við sjáum til. En það að vera fremstur er besti mögulegi staðurinn til að ræsa af stað á."

„Ég held að hraðinn sé til staðar í bílnum. Þetta er aldrei auðvelt og verður það ekki á morgun, en ég tel held að við erum tilbúnir að berjast, eins og í tveimur síðustu mótum og við sjáum hvað gerist á morgun", sagði Vettel.