Lagrade með forystuna í kapphlaupinu um AGS

Christine Lagarde fjármálaráðherra Frakklands er með afgerandi forystu þegar kemur að valinu á nýjum forstjóra Alþjóðagjaldeyrissjóðsins.

Fjallað er um málið í Financial Times. Þar segir að Evrópubúar hafi fullan hug á að halda forstjórastöðu AGS innan sinna raða eins og verið hefur í 65 ár eða allt frá stofnun sjóðsins. Bæði Bretar og Þjóðverjar styðja Lagarde í forstjórastöðuna sem og Frakkar auðvitað.

Bæði George Osborne fjármálaráðherra Breta og Wolfgang Schäube fjármálaráðherra Þýskalands hafa farið fögrum orðum um Lagarde.  Schäube segir að ef Lagrade gefi kost á sér í forstjórastarfið sé það besti möguleiki Evrópu til að halda starfinu innan sinna raða.

Ekki eru þó allir sammála um ágæti Lagarde. Þannig hefur Didier Reynders fjármálaráðherra Belgíu lýst yfir því að hann muni einnig sækjast eftir starfinu í samkeppni við hana. Reynders segir að starf forstjóra AGS sé ekki staða sem hægt sé að hafna.

Mest er andstaðan þó gegn Lagrande í löndum utan Evrópu. Þannig hafa fjármálaráðherrar Suður Afríku og Ástralíu kallað eftir því að ráðið verði í starfið á grundvelli hæfileika en ekki þjóðernis.