Meistaranum Vettel hlakkar til næsta móts eftir páskaeggjaát

Forystumaður stigamótins í Formúlu 1, Sebastian Vettel nýtti páskafríið vel og hitti vini sína og gæddi sér á nokkrum páskaeggjum eins og hann orðaði það í fréttatilkynningu frá Red Bull. Vettel og Mark Webber, liðsfélagi hans hjá Red Bull keppa næst í Tyrklandi um aðra helgi og kunna báðir vel við mótssvæðið.

„Ég kann vel við Istanbúl Park og brautin er verðugt viðfangsefni. Beygja átta er mjög, mjög löng háhraða beygja með nokkrum sveigum, sem reynir á dekk og háls ökumanna", sagði Vettel í fréttatilkynningunni. Vettel vann tvö fyrstu mót ársins, en Lewis Hamilton vann síðustu keppni, sem var í Kína.

Vettel segir að ef beygja átta á Istanbúl Park brautinni er ekinn af nákvæmni þá skili það sínu, ef hún er tekinn rétt í byrjun, þá náist góð aksturslína í gegnum hana. Beygja átta er rómuð meðal margra ökumanna og krefst góðrar uppsetningar keppnisbílanna.

„Því miður er nokkuð dýrt fyrir heimamenn að mæta á mótið, sem þýðir að stemmningin er ekki eins mikil og hún gæti verið. Það er synd, þar sem ökumenn hlakkar til að mæta þangað. Það veit ég hvað mig varðar", sagði Vettel.

Webber slakaði á með fjölskyldu og vinum í páskrafríinu og þjálfaði líka líkamann fyrir átökin í Tyrklandi. Hann kvað gott að gera venjulega hluti á ný, eftir mikil ferðalög vegna Formúlu 1 mótanna. Fyrstu þrjú mót ársins voru í Ástralíu, Malasíu og Kína, en Webber býr í Englandi, þar sem Red Bull liðið er staðsett.

„Ég kann vel við tyrknesku brautina, sem er með allar gerðir af beygjum, hægar og hraðar, eins og beygja átta. Það er frábær beygja og við reynum að ná henni á fullri bensíngjöf, ár frá ári. Beygjan er svo hröð og mishæðótt að maður sér varla hvert maður er að fara. Maður beygir og vonar það besta.", sagði Webber.

Webber segir venjulega heitt í Tyrklandi og hann kann vel við staðinn af því að hann prófaði Formúlu 1 bíl í fyrsta skipti þar í landi.

„Bíll okkar ætti að vera öflugur þarna, en auðvitað berum við virðingu fyrir keppinautum okkar og tökum engu sem sjálfsögðum hlut. Fólk er að leggja hart að sér, en við gerum okkar til að viðhalda styrkleika okkar", sagði Webber.