Aquilani opinn fyrir því að snúa aftur til Liverpool

Alberto Aquilani segist ekki mótfallinn því að snúa aftur til Liverpool ef að Juventus ákveður ekki að kaupa hann í lok tímabilsins.

Aquilani var lánaður til Juventus síðastliðið sumar en félagið á rétt á að kaupa hann fyrir ákveðna upphæð í lok tímabilsins.

„Framtíðin? Ég er hjá Juve núna og ég veit ekki hvað mun gerast. Ég er hér á lánssamningi og ef félagið kaupir mig ekki fer ég aftur til Liverpool sem spilar í bestu deild heims. Við þurfum að bíða og sjá til,“ sagði Aquilani.

Hann var keyptur frá Roma á Ítalíu sumarið 2009 en náði ekki að festa sig í sessi hjá Liverpool. Aquilani hefur einnig verið orðaður við sitt gamla félag.

„Þetta er viðkvæmt mál. Ég myndi fara en ég held að það gæti reynst erfitt. Ég er þó forvitinn, sérstklega ef félagið ákveður að kaupa nýja leikmenn og byggja upp liðið á nýtt.“