Vikutilboð í Netto: Geimferð fyrir 10 milljónir

Tilboðabæklingur verslunarkeðjunnar Netto í Danmörku fyrir þessa viku er með nokkuð óvenjulegu sniði. Á milli auglýsinga um að kassinn af dósaöli sé á tæpar 80 danskra kr. og stór flaska af gosdrykkjum á 12 kr. danskar er að finna tilboð um geimferð á rúmlega hálfa milljón danskra kr. eða rúmlega 10 milljónir kr.

„Uppfylltu draum þinn um að verða aðstoðarmaður geimflugmanns í ekta geimskipi sem flýgur alveg að mörkunum á gufuhvolfinu," segir í tilboðabæklingi Netto.

Helle Stenbak innkaupastjóri Netto segir í samtali við Berlingske Tidende að þetta sé villtasta og dýrasta tilboð sem sett hafi verið inn í þessa vikulegu tilboðabæklinga keðjunnar. Helle segir einnig að margir hafi talið þetta vera snemmbúið aprílgabb en það er ekki málið. Tilboðið er liður í samstarfi Netto við fyrirtækið oplevelsesgaver.dk.

Sjálf geimferðin verður á vegum bandaríska fyrirtækisins XCor sem notar Lynx flugvél sem það hefur smíðað til að senda einn farþega, ásamt flugmanni, út að endimörkum gufuhvolfsins. Flugvél þessi getur tekið á loft og lent á venjulegum flugvöllum.

Þeir sem kaupa miða í þessar geimferðir fá sérstaka fimm daga þjálfun með í kaupunum þar sem þeim er kennt að ráða við þrýsting upp á 2,5 falt þyngdaraflið ásamt sérstakri læknisskoðun.