Sigurður Gunnar besti Íslendingurinn í 8 liða úrslitunum

Keflvíkingurinn Sigurður Gunnar Þorsteinsson skilaði hæstu framlagi íslensku leikmannanna í átta liða úrslitum Iceland Express deildar karla sem lauk með þremur oddaleikjum í gærkvöldi. Sigurður Gunnar var 0.5 framlagsstigum á undan KR-ingnum Pavel Ermolinskij og aðeins Kelly Biedler hjá ÍR og Marcus Walker hjá KR skiluðu meira til sinna liða í þessum leikjum.

Sigurður Gunnar var með 23,3 stig, 7.0 fráköst og 2,0 stoðsendingar að meðaltali á 31 mínútu í einvíginu á móti ÍR en hann hitti þar úr 72,5 prósent skota sinna og setti niður 73,3 prósent vítanna. Sigurður var með 26 stig og 5 fráköst í oddaleiknum. Sigurður var með framlag upp á 28,0 að meðaltali í leik. Hann hækkaði sig frá því í deildarkeppninni þar sem hann var með 15,1 stig og í 18,8 í framlagi að meðaltali í leik.

KR-ingurinn Pavel Ermolinskij var með þrefalda tvennu að meðaltali á móti Njarðvík, skoraði 11,0 stig, tók 13,5 fráköst og gaf 10,0 stoðsendingar að meðaltali í leik. Pavel hitti "bara" úr 35 prósent skota sinna og tapaði 3,5 boltum að meðaltali í leik sem dróg hann niður en hann var þó aðeins 0,5 framlagsstigi á eftir Sigurði.

Þeir Sigurður Gunnar (3. sæti) og Pavel (4. sæti) voru einu íslensku leikmennirnir inn á topp tíu listanum en það var ÍR-ingurinn Kelly Biedler sem skilaði hæstu framlagi allra leikmanna og var þar rétt á undan KR-ingnum Marcus Walker.

Keflavíkingurinn Hörður Axel Vilhjálmsson var í þriðja sætinu af íslensku leikmönnunum en hann var með 15,7 stig, 6,3 fráköst og 7,0 stoðsendingar að meðaltali í leik. Hörður var með 20,33 framlagssstig í leik en hann lækkaði reyndar í framlagi í hverjum leik eftir að hafa farið á kostum með 21 stigi, 8 fráköstum, 12 stosðendingum og 35 framlagsstigum í fyrsta leiknum.

Hæsta framlag leikmanna í 8 liða úrslitunum:Íslenskir leikmenn

1. Sigurður Gunnar Þorsteinsson, Keflavík 28,00

2. Pavel Ermolinskij, KR 27,50

3. Hörður Axel Vilhjálmsson, Keflavík 20,33

4. Páll Axel Vilbergsson, Grindavík 16,00

4. Ólafur Ólafsson, Grindavík 16,00

6. Brynjar Þór Björnsson, KR 15,50

7. Jóhann Árni Ólafsson, Njarðvík 15,00

8. Örn Sigurðarson, Haukar 14,00

8. Finnur Atli Magnússon, KR 14,00

10. Magnús Þór Gunnarsson, Keflavík 13,33

Erlendir leikmenn

1. Kelly Biedler, ÍR 28,67

2. Marcus Walker, KR 28,50

3. Renato Lindmets, Stjarnan 24,67

4. Ryan Amaroso, Snæfell 23,33

5. Semaj Inge, Haukar 22,67

5. Nemanja Sovic, ÍR 22,67

7. Ryan Pettinella, Grindavík 21,33

8. Gerald Robinson, Haukar 21,00