Ekki staðið við samkomulag um bónusa

Stóru bankarnir í Bretlandi hafa ekki staðið við samkomulag, sem gert var við stjórnvöld í síðasta mánuði, um að halda kaupaukum æðstu stjórnenda bankanna í skefjum.

Harðar deilur hafa blossað upp síðustu daga í Bretlandi vegna frétta af því að bankastjórar hafa verið að fá veglega bónusa.

Til dæmis fékk Stephen Hester, framkvæmdastjóri Royal Bank of Scotland, 4,5 milljónir punda í viðbótarbónus fyrir síðasta ár ofan á 1,2 milljón punda árslaun og 2,2 milljón punda árlegs kaupauka. Samtals er bankinn því að borga honum 7,7 milljónir punda fyrir störf hans árið 2010, en það samsvarar um það bil 1,5 milljarði króna.

Einnig fékk Bob Diamond, framkvæmdastjóri Barclays PLC, 6,5 milljónir punda samanlagt í kaupauka fyrir síðasta ár, í viðbót við 250 þúsund punda árslaun. Þá fékk Stuart Gulliver, framkvæmdastjóri HSBC, 6,2 milljónir punda í kaupauka og laun samtals.

Verkalýðsfélög í Bretlandi hafa gagnrýnt þetta harðlega.  "Meðan allir aðrir hafa áhyggjur af því að greiða heimilisreikningana, þá eru þessir menn að telja seðlabúntin sín," segir Len McClusky, framkvæmdastjóri verkalýðsfélagsins Unity. - gb