Jón Ólafur og Hrafn kosnir bestir í seinni hlutanum

Jón Ólafur Jónsson, leikmaður Snæfells, og Hrafn Kristjánsson, þjálfari KR, voru í dag kostnir bestir í umferðum 12 til 22 í Iceland Express deild karla. Valið var tilkynnt á blaðamannafundi hjá KKÍ en þá kom einnig í ljóst hverjir voru valdir í fimm manna úrvalslið.

Jón Ólafur Jónsson var með 20,6 stig og 10,1 frákast að meðaltali í leik og hjálpaði Snæfelli að tryggja sér deildarmeistaratitilinn í seinni hlutanum.

Aðrir í úrvalsliðinu voru liðsfélagi Jón Ólafs hjá Snæfelli, Pálmi Freyr Sigurgeirsson, KR-ingarnir Pavel Ermolinskij og Marcus Walker og Keflvíkingurinn Sigurður Gunnar Þorsteinsson.

Pavel og Jón Ólafur voru báðir í úrvalsliðinu fyrir fyrri hlutann en Pavel var þá kosinn besti leikmaðurinn.

Hrafn Kristjánsson stýrði KR til sigurs í 9 af 11 deildarleikjum eftir áramót auk þess að KR tryggði sér bikarmeistaratitilinn í fyrsta sinn í tuttugu ár. Hann var valinn besti þjálfarinn en Ingi Þór Steinþórsson, þjálfari Snæfells, hafði fengið þessi verðlaun fyrir fyrri hlutann.

Tindastólsmaðurinn Helgi Rafn Viggósson var kosinn mesti dugnaðarforkurinn í deildinni og besti dómarinn var valinn Njarðvíkingurinn Sigmundur Már Herbertsson alveg eins og í fyrri hlutanum.



´

Verðlaunin fyrir seinni hlutann:Úrvalslið Iceland Express-deildar karla í umferðum 12-22

Pavel Ermolinskij · KR

Marcus Walker · KR

Pálmi Freyr Sigurgeirsson · Snæfell

Jón Ólafur Jónsson · Snæfell

Sigurður Gunnar Þorsteinsson · Keflavík

Dugnaðarforkurinn

Helgi Rafn Viggósson · Tindastól

Besti þjálfarinn

Hrafn Kristjánsson · KR

Besti leikmaðurinn

Jón Ólafur Jónsson · Snæfell

Besti dómarinn í Iceland Express-deildum

Sigmundur Már Herbertsson