Liuzzi ráðinn sem ökumaður Hispania

Tonio Liuzzi frá Ítalíu var í dag staðfestur sem ökumaður Hispania Formúlu 1 liðsins og þar með er búið að fylla öll 24 sæti ökumanna fyrir þetta keppnistímabil.

Liuzzi mun aka með Hispania liðinu ásamt Narain Karthikeyan frá Indlandi í fyrsta móti ársins sem verður í Ástralíu 27. mars.

"Ég er mjög hamingjusamur að hafa skrifað undir samning við Hispania Racing", sagði Liuzzi í frétt á autosport.com í dag.

Hann ók með Force India í fyrra, en missti sæti sitt hjá liðinu, en prófaði síðan bíl Hispania á brautinni í Katalóníu á Spáni í síðasta mánuði.

"Ég tapaði aldrei voninni um það að vera í Formúlu 1, þar sem ég er með reynsluna og réttu samsetninguna fyrir ungt og metnaðarfullt lið. Nú taka við ný viðfangsefni og það er spennandi. Þá verður mikil vinna að leiða Hispania í gegnum þróunarvinnu á nýja bíl okkar", sagði Liuzzi.

Liuzzi kvaðst ákaflega þakklátur þeim Jose Ramon Carbante og Colin Kolles að færa honum tækifæri um borð í Hispania bíl.

Hispania liðið mun afhjúpa nýjan keppnisbíl sinn á Katalóníu brautinni á Spáni á föstudaginn, en Formúlu 1 keppnislið eru við æfingar á brautunni næstu daga