Loftlausa fólkið Sigríður Víðis Jónsdóttir skrifar 10. mars 2011 06:00 Við tölvuskjá um morgun situr svefndrukkin manneskja með bauga undir augum, axlirnar stífar, andlitið fölt. Morgunþreytan liggur eins og mara yfir skrifstofunni, syfjaður starfsmaður teygir sig skjálfhentur í kaffibolla. Enn er dimmt úti, ætlar aldrei að birta? Á sama tíma, í sömu götu, er leikskólabörnum skutlað út í snjóinn. Dúðuð upp fyrir haus fljúga börnin eitt af öðru út um dyrnar – minnstu krakkarnir lappastuttir, flísklæddir dvergar sem velta hnöttóttir áfram. Út með ykkur kæru börn, það er svo hollt að viðra sig! Í nálægum grunnskóla hópast glaðleg börn með rauðar kinnar inn úr snjónum. Fólkið á skrifstofunni vinnur innivinnu eins og flestir fullorðinna á Íslandi. Fer ekki út allan liðlangan daginn og fær sér einungis meira kaffi þegar þokumóðan þéttist. Börnin eru á hinn bóginn skikkuð út í ferska loftið nokkrum sinnum yfir sinn vinnudag. Enda alkunna að annars slokknar hreinlega á þeim. Svo eru foreldrarnir hissa á því að þeir sjálfir séu búnir á því í lok dags, morknir af inniverunni? Þetta er rugl. Börnin hafa auk þess þegar súrefnisforskot á þá sem eldri eru – þau eru mun líklegri til að ganga og hjóla í skólann en foreldrarnir í sína vinnu. Í þau fáu skipti sem ég sjálf hef bíl til umráða verð ég vör við merkjanlegan mun á eigin virkni og vellíðan. Þá ek ég í vinnuna „því ég er með bílinn" og sest svo grútsyfjuð niður við tölvuna – ekki enn vöknuð því ég er ekki búin að fá ferska loftið sem ég fæ á hjólinu. Lufsast enn slappari heim í lok dags. Það besta við að hjóla er ekki endilega að spara tugþúsundir í hverjum mánuði heldur að fá blóðið af stað og koma frísk aftur heim úr vinnu. Það tók mig vandræðalega mörg ár að átta mig á beinu samhengi eigin vellíðunar, framleiðslugetu og þess að byrja og enda vinnudaginn á útiveru. Enn lengri tíma tók að átta mig á mikilvægi þess að skjótast út í hádeginu þegar skammdegið er sem mest og líta aðeins framan í daginn. Frænka mín fer iðulega í birtugöngutúra eftir hádegismat, annars er sólin löngu horfin þegar hún snýr aftur heim úr vinnu. Það er engum hollt að sjá aldrei bjartan dag. Önugt fólk í ábyrgðarstöðum á vitanlega að skikka út í ferska loftið eins og litlu krakkana, freista þess að viðra úr því fúllyndin – og auka afköstin. Við gætum byrjað á frímínútum og skipulögðum birtugöngutúrum á Alþingi. Viltu birta grein á Vísi? Sendu okkur póst. Senda grein Sigríður Víðis Jónsdóttir Mest lesið Sá tapar sem fyrstur nefnir nasistana: gengisfelling orðsins „rasisti“ Birgir Finnsson Skoðun Þegar þeir sem segjast þjóna þjóðinni ráðast á hana Ágústa Árnadóttir Skoðun Gleymdu að vanda sig Vanda Sigurgeirsdóttir Skoðun Skref aftur á bak fyrir konur með endómetríósu Sigurður Ingi Jóhannsson Skoðun Rasismi útskýrir stuðning við þjóðarmorð Ingólfur Gíslason Skoðun Heilbrigðiskerfið í bakkgír Ingibjörg Isaksen Skoðun Staða leikskólamála í Reykjanesbæ Guðný Birna Guðmundsdóttir Skoðun Óttumst við það að vera frjálsar manneskjur í frjálsu landi? Arnar Þór Jónsson Skoðun Vindhögg Viðskiptaráðs Finnbjörn A. Hermannsson Skoðun Þetta eru börnin sem ég hef áhyggjur af í skólakerfinu Rakel Linda Kristjánsdóttir Skoðun
Við tölvuskjá um morgun situr svefndrukkin manneskja með bauga undir augum, axlirnar stífar, andlitið fölt. Morgunþreytan liggur eins og mara yfir skrifstofunni, syfjaður starfsmaður teygir sig skjálfhentur í kaffibolla. Enn er dimmt úti, ætlar aldrei að birta? Á sama tíma, í sömu götu, er leikskólabörnum skutlað út í snjóinn. Dúðuð upp fyrir haus fljúga börnin eitt af öðru út um dyrnar – minnstu krakkarnir lappastuttir, flísklæddir dvergar sem velta hnöttóttir áfram. Út með ykkur kæru börn, það er svo hollt að viðra sig! Í nálægum grunnskóla hópast glaðleg börn með rauðar kinnar inn úr snjónum. Fólkið á skrifstofunni vinnur innivinnu eins og flestir fullorðinna á Íslandi. Fer ekki út allan liðlangan daginn og fær sér einungis meira kaffi þegar þokumóðan þéttist. Börnin eru á hinn bóginn skikkuð út í ferska loftið nokkrum sinnum yfir sinn vinnudag. Enda alkunna að annars slokknar hreinlega á þeim. Svo eru foreldrarnir hissa á því að þeir sjálfir séu búnir á því í lok dags, morknir af inniverunni? Þetta er rugl. Börnin hafa auk þess þegar súrefnisforskot á þá sem eldri eru – þau eru mun líklegri til að ganga og hjóla í skólann en foreldrarnir í sína vinnu. Í þau fáu skipti sem ég sjálf hef bíl til umráða verð ég vör við merkjanlegan mun á eigin virkni og vellíðan. Þá ek ég í vinnuna „því ég er með bílinn" og sest svo grútsyfjuð niður við tölvuna – ekki enn vöknuð því ég er ekki búin að fá ferska loftið sem ég fæ á hjólinu. Lufsast enn slappari heim í lok dags. Það besta við að hjóla er ekki endilega að spara tugþúsundir í hverjum mánuði heldur að fá blóðið af stað og koma frísk aftur heim úr vinnu. Það tók mig vandræðalega mörg ár að átta mig á beinu samhengi eigin vellíðunar, framleiðslugetu og þess að byrja og enda vinnudaginn á útiveru. Enn lengri tíma tók að átta mig á mikilvægi þess að skjótast út í hádeginu þegar skammdegið er sem mest og líta aðeins framan í daginn. Frænka mín fer iðulega í birtugöngutúra eftir hádegismat, annars er sólin löngu horfin þegar hún snýr aftur heim úr vinnu. Það er engum hollt að sjá aldrei bjartan dag. Önugt fólk í ábyrgðarstöðum á vitanlega að skikka út í ferska loftið eins og litlu krakkana, freista þess að viðra úr því fúllyndin – og auka afköstin. Við gætum byrjað á frímínútum og skipulögðum birtugöngutúrum á Alþingi.