Daewo staðfestir að Mærsk hafi pantað 10 risaflutningaskip

Skipasmíðastöðin Daewo í Suður Kóreu hefur nú staðfest að danska skipafélagið Mærsk Line hefur pantað 10 risavaxin flutningaskip hjá stöðinni.

Óstaðfestar fréttir hafa verið um málið í dönskum fjölmiðlum undanfarin mánuð. Samkvæmt frétt á börsen.dk er um að ræða 440 metra löng flutningskip sem geta flutt allt að 18.000 stykki af 20 feta gámum í einu. Samningurinn er metinn á 1,8 milljarða dollara eða rúmlega 210 milljarða kr.

Á Bloomberg fréttaveitunni segir að Mærsk hafi einnig samið um kauprétt á 10 til 20 af þessum risaskipum og metur fréttaveitan samninginn á yfir 4 milljarða dollara.

Sem stendur á Mærsk nokkur af stærstu fraktskipum heimsins. Um er að ræða skip í svokölluðum E-klassa en þau geta flutt allt að 14,770 stykkjum af 20 feta gámum.