Ecclestone vill koma Formúlu 1 mótinu í Barein aftur á dagskrá

Bernie Ecclestone segist ætla gera sitt til þess að Barein mótið komist aftur á dagskrá á þessu ári, en mótið átti að vera 13. mars, en var fellt niður vegna ástandsins í landinu. Tuttugu mót voru á dagskrá FIA, alþjóðabílasambandins í ár og höfðu aldrei verið fleiri. Mótið í Barein átti að vera það fyrsta á árinu, en þess í stað verður Formúlu 1 mótið í Ástralíu 27. mars það fyrsta, en síðasta mót ársins verður í Brasilíu 25. nóvember. "Það sem hefur gerst í Barein er sorglegt, en fyrir mánuði síðan hlakkaði öllum til mótsins. Þá voru engin vandamál og ef allt verður með kyrrum kjörum, sem við vonum, þá munum við gera okkar besta til að koma mótinu fyrir", sagði Ecclestone í Daily Telegraph um mál Barein, samkvæmt frétt á autosport.com. Hann sagði líka að FOM, fyrirtæki sem hann starfar hjá myndi bera kostnað af mótinu sem var hætt við, sem er um 40 miljónir dala. Ecclestone sagði að hann myndi ekki fara fram á greiðslu frá Barein. "Hvort þeir eru tryggðir fyrir töpuðum tekjum, af miðasölu og slíku veit ég ekki. En þetta eru sérstakar aðstæður, svipað og ef jarðskjálfti hefði orðið", sagði Ecclestone og gat þess að ef Barein mótið yrði aftur á dagskrá á þessu ári, þá þyrftu mótshaldarar að greiða hefðbundið gjald.