Schumacher fagnaði Vettel eftir að hafa lent í stórhættu í lokamótinu

Þjóðverjinn Michael Schumacher fagnaði landa sínum og vini, Sebastian Vettel vel í dag eftir að titilinn var í höfn hjá þeim síðarnefnda. Þeir eru einu ökumennirnir sem hafa orðið meistarar í Formúlu 1 frá Þýskalandi. Schumacher sá Vettel keyra á kartbraut sem hann á í Kerpen í Þýskalandi og taldi hann efni í framtíðarmeistara. Áratug síðar er það staðreynd. Vettel er meistari sex árum eftir að Schumacher vann sinn síðasta titil með Ferrari. "Ég er hamingjusamur fyrir hans hönd. Við erum vinir og þetta er búið að vera erfitt ár hjá honum. Það hefur gengið misjafnlega hjá honum og vandamál varðandi bílinn, frekar en akstursmáta hans. Hann á titilinn skilið", sagði Schumacher í samtali við BBC. Schumacher segir Vettel frábæran ökumann og náunga, en þeir koma til með að keyra í meistarakeppni ökumanna í Dusseldorf eftir tvær vikur fyrir hönd Þýskalands og í einstaklingskeppni. Schumacher var stálheppinn í dag að meiðast ekki þegar hann snerist í brautinni og bíll Viantonio Liuzzi klifraði upp á hans bíl. Schumacher sagði atvikið hafa vakið skelfingu og litið illa út, en öryggið væri mikið í Formúlu 1 og ekkert hefði komið fyrir hann. Hann þurfti þó að fara skoðun hjá lækni á mótsstaðnum til öryggis. "Ég hefði viljað ljúka keppnistímabilinu á annan hátt, en ég hlakka til að berjast á næsta ári", sagði Schumacher.