Frumraun Khan í Bandaríkjunum verður líklega á móti Malignaggi

WBA-léttveltivigtarmeistarinn Amir Khan hefur staðfest að verið sé að vinna í því að setja upp bardaga á milli hans og Paulie Malignaggi í Madison Square Garden-höllinni í New York í Bandaríkjunum í maí.

Bretinn Khan hefur aldrei barist í Bandaríkjunum áður en hann skrifaði nýverið undir samning við Golden Boy promotions umboðsskrifstofuna, sem fyrrum hnefaleikakappinn Oscar De La Hoya er í forsvari fyrir, í von um að koma sér betur á framfæri á Bandaríkjamarkaði.

„Það er búið að ákveða stað og stund en þetta verður í New York í Bandaríkjunum þann 15. maí og við erum að tala við Malignaggi. Þetta er í raun undir honum komið hvort hann sé til í þetta. Ég á reyndar ekki von á öðru en að hann sé klár í slaginn því hann er frá New York en ég vil vinna hann fyrir framan stuðningsmenn hans," segir Khan í viðtali við Sky Sports fréttastofuna.