Briatore: Betra skipulag Formúlu 1 nauðsynlegt

Flavio Briatore, fyrrum framkvæmdarstjóri Renault liðsins telur að betur megi ef duga skal hvað varðar mótshald í Formúlu 1. Hann var rekinn frá Renault fyrir að svindla í Singapúr og dæmdur í ævilangt bann, en því var hnekkt fyrir nokkrum vikum. Þrátt fyrir þetta hyggst Briatore ekkert mæta aftur í slaginn í Formúlu 1 að eigin sögn. "Ég held að eftir að hafa unnið sjö titla með tveimur mismunandi liðum, þá myndi ekki skipta mig að bæta þeim áttunda við. Það var kraftaverk að vinna með Renault 2005-2006 og maður getur ekki skapað kraftaverk endalaust.Ég hef ekki lengur sama áhuga á Formúlu 1. Adrenalínið er ekki til staðar. Ég sakna þess ekkert.", sagði Briatore í frétt á autosport.com sem vitnar í ítalska tímaritið Autosprint. Hann telur að bæta þurfi umgjörðina um Formúlu 1 og telur að FIA hafi farið ranga leið í að hleypa nýjum liðum inn í íþróttina í stað þess að leyfa liðum sem voru fyrir að mæta með þriðja keppnisbílinn í mótin. "Það ríkir ringulreið í Formúlu 1 og það hlýtur að breytast. Ég sé ekki að íþróttin eigi bjarta framtíð miðað við núverandi stöðu. Við vildum þriggja bíla lið, en í staðinn opnaði FIA leiðina fyrir lið sem höfðu ekkert fjármagn. Ég tel að það hafi verið slæm ákvörðun." "Það eru lið í Formúlu 1 sem eru tveimur sekúndum fljótari en GP2 lið og verja til þess 60-70 miljónum evra á meðan GP2 lið kosta til þremur. Það er eitthvað að þar á bæ... ", sagði Briatore, en GP 2 mótaröðin er næsta mótaröð fyrir neðan Formúlu 1 að styrkleika. Úr þeirri mótaröð hafa margir Formúlu 1 ökumenn stigið upp í Formúlu 1.