Barrichello líst vel á 2011 bíl Williams

Rubens Barrichello verður áfram hjá Williams liðinu á næsta ári, en ekki er vitað um hver verður liðsfélagi hans sem ökumaður, en rætt hefur verið um að GP2 meistarinn Pastor MalDonado komi til greina hjá liðinu. MalDonado prófaði bíl liðsins í Abu Dhabi á dögunum. Barrichello telur að Williams sé að gera góða hluti varðandi bíl næsta árs og hann hefði góða tilfinningu fyrir því sem væri verið að gera fyrir næsta ár. Aðspurður í frétt á autosport.com hvort Barrichello telji að Williams taki framförum 2011 sagði Barrichello. "Það er aldrei hægt að segja um slíkt, því ef þú talaðir um slíkt við öll lið núna, þá myndu þau selja þér það að þau væri með sigurbíl á næsta ári", sagði Barrichello. "Bíll okkar í vindgöngum virðist virka vel. Við verðum bara að hafa báða fætur á jörðu og vinna áfram með hann", sagði Barrichello. Williams varð í sjötta sæti í stigamóti bílasmiða á árinu, en Barrichello telur að liðinu hafi vaxið ásmeginn eftir mótið í Istanbúl í Tyrklandi og vinna í vindgöngum hafi skilað tilætluðum árangri. Jafnvel þó útkoman hafi ekki alltaf verið sem best í mótum, þá hafi liðið átt ágæta spretti á köflum í mótum.