Bolt sterkur í pílukasti

Sprettharðasti maður jarðarinnar, Usain Bolt, er hæfileikaríkur maður með eindæmum eins og starfsmenn slúðurblaðsins The Sun komust að á dögunum.

Þegar Bolt kíkti við á skrifstofu blaðsins þá reyndi hann fyrir sér í pílukasti í fyrsta sinn á ævinni.

Bolt gerði sér lítið fyrir og henti fyrstu pílunni í þrefaldan 20 sem er það hæsta sem hægt er að fá í pílukasti. Hann fylgdi því eftir með tveimur köstum í 20. 100 stig. Vel gert.

Bretarnir urðu yfir sig hrifnir enda er pílan í miklum metum í Bretlandi.

"Ég elska þennan leik. Ég verð að fá mér píluspjald heima," sagði brosmildur Bolt.