Actavis með besta tilboðið í Ratiopharm

Samkvæmt Reuters mun tilboð Actavis nema 3 milljörðum evra, eða um 522 milljarðar kr., en það er verðið sem Merckle fjölskyldan telur ásættanlegt. Hinsvegar gæti mikil skuldsetning Actavis dregið úr möguleikum þess á að kaupa Ratiopharm.

Actavis keppir um Ratiopharm við bandaríska lyfjarisann Pfizer og Teva sem er stærsta samheitalyfjafyrirtæki heimsins. Þessi þrjú fyrirtæki hafa öll sent inn tilboð og hafa kynnt þau fyrir stjórn Ratiopharm.

Reiknað er með að Actavis, Pfizer og Teva leggi fram lokatilboð sín fyrir næstu mánaðarmót.

Eins og áður hefur komið fram styður Deutsche Bank við Actavis í viðleitninni við að kaupa Ratiopharm. Actavis skuldar um 5 milljarða evra og þar af heldur Deutsche Bank á rúmum 4 milljörðum. Reuters nefnir aftur að sennilega muni Deutsche Bank breyta töluverðu af skuldunum í hlutabréf ef af kaupunum á Ratiopharm verður.