Begiristain hættur hjá Barcelona

Txiki Begiristain er hættur sem yfirmaður knattspyrnumála hjá Barcelona en hann hefur verið hægri hönd Joan Laporta, forseta félagsins, undanfarin ár.

Kjörtímabili Laporta lauk nú í sumar og því ákvað Begiristain að hætta sömuleiðis. Sanddro Rosell er nýr forseti Barcelona.

Begiristain hefur gegnt þessu hlutverki í sjö ár hjá félaginu en hann lék á árum áður á miðjunni með Barcelona.

Einn af þeim 38 leikmönnum sem Begiristain hefur fengið til félagsins á þessum tíma er Eiður Smári Guðjohnsen en á sama tímabili hafa 35 leikmenn horfið á braut. Eiður Smári kom árið 2006 en fór í fyrra til AS Monaco í Frakklandi.