Helga Margrét yfir 1,65 í hástökki

Helga Margrét Þorsteinsdóttir stökk yfir 1,65 metra í hástökkskeppninni í sjöþraut á EM í Barcelona.

Helga felldi 1,68 þrisvar sinnum.

Hún varð í ellefta í sínum riðli og er nú í 24. sæti af 26 keppendum.

Helga sleppti 1,53 metrum en stökk í fyrstu tilraun yfir 1,56 metra, 1,59 metra, 1,62 metra og að lokum 1,65 metra.

Hún fékk 798 stig fyrir árangurinn og er með 1643 stig eftir tvær greinar.

Á HM í Kanada um síðustu helgi stökk hún yfir 1,63 metra og fékk 771 stig. Hún bætti sig því frá því þar.