Webber sá við Hamilton í tímatökum á Spa

Mark Webber sem er efstur að stigum í stigamóti ökumanna verður fremstur á ráslínu í kappakstrinum á Spa brautinni á morgun. Hann náði besta tíma í tímatökum í dag á Red Bull bíl á undan Lewis Hamilton á McLaren, en Robert Kubica á Renault varð þriðji, en Sebastian Vettel fjórði.

Fimm ökumenn er í titilslagnum, þegar sjö mótum er ólokið og meistarinn Jenson Button á McLaren sem varð fimmti í dag er meðal þeirra, auk Webbers, Hamilton, Vettel og Fernando Alonso sem náði aðeins tíunda besta tíma í tímatökunni á Ferrari.

Webber er í kjörstöðu fremstur á ráslínu, en hann er með 161 stig í stigakeppni ökumanna, Hamilton er með 157, Vettel 151, Button 147 og Alonso 141.

Fyrir sigur í móti fást 25 stig, annað sætið 18, síðan 15, 12, 10 og færri fyrir næstu sæti á eftir. En vegna stigagjafarinnar er sigur mikilvægari í ár en síðustu ár.

Bein útsending er frá kappakstrinum á Spa brautinni á Stöð 2 Sport kl. 11.30 á sunnudag og er í opinni dagskrá. Strax á eftir er þátturinn Endmarkið, þar sem farið er yfir það helsta sem gerðist í mótinu.