Delaware orðið helsta skattaskjól heimsins

Þetta kemur fram í nýrri skýrslu á vegum óháðu samtakanna Tax Justice Network. Deleware toppar þar nýjan lista yfir skattaskjól og næst á honum koma Lúxemborg, Sviss og Cayman eyjar.

Samkvæmt frétt um málið í Aftenposten er tekið dæmi um hve auðvelt sé að leyna peningum í Delaware en það byggir á rannsókn þýskra og rússneskra rannsóknaraðila á fjármagnstilfærslum fyrrum yfirmanna tölvufyrirtækisins Hewlett Packard. Þessar yfirfærslur enduðu m.a. í Delaware.

Í mati sínu á skattaskjólum leggur Tax Justice Network til grundvallar löggjöf, alþjóðlega samninga, útbreiðslu fjármálakerfisins og dreifingu viðskiptavina þess á heimsvísu.

Sviss er neðar á listanum en Lúxemborg í ár sem ekki hefur komið fyrir áður. Bent er á í umfjöllun Aftenposten að Kim Jong II, einræðisherra Norður-Kóreu, hafi nýlega flutt auðæfi sín frá Sviss og yfir til Lúxemborgar. Þetta gerði Jong í kjölfar áforma svissneskra yfirvalda að herða lög landsins hvað varðar peningaþvætti.