Leikmaður Dallas bað Vick um eiginhandaráritun

Vísir greindi um daginn frá ótrúlegri uppreisn hundatemjarans Michael Vick í NFL-deildinni. Þessi fyrrum hataðasti íþróttamaður Bandaríkjanna er langefstur í vali aðdáenda í stjörnuleik NFL-deildarinnar.

Það sem meira er þá hefur hann spilað svo vel með Philadelphia Eagles í vetur að talað er um að hann verði valinn besti leikmaður deildarinnar.

Hann virðist einnig vera orðinn vinsæll hjá andstæðingum sínum því Tashard Choice, hlaupari Dallas Cowboys, bað hann um eiginhandaráritun eftir leik liðanna.

„Ég hef ekki lent í svona uppákomu áður á ferlinum," sagði Vick eftir leikinn.

Choice bað Vick um að skrifa á hanska og sagði síðar að áritunin hefði verið fyrir frænda sinn. Ekki eru allir að kaupa það.