GP 2 meistarinn Maldonaldo prófaði Hispania og Williams

Pastor Maldonado frá Venusúela prófaði Hispania og Willams bíla á æfingum í Abu Dhabi í vikunni, en nokkur umræða hefur verið um að hann taki autt sæti sem Nico Hulkenberg skildi eftir sig þar. Hulkenberg ætlar að leita á önnur mið, en Rubens Barrichello verður áfram hjá Williams. Maldondo er sagður vera með mikið fjármagn með sér í formi auglýsingaaðila og Williams menn eru sagðir hafa áhuga á kappanum, bæði sökum þess og að hann er snar í snúningum. Maldonado varð mestari í GP2 mótaröðinni í ár, sem er undirmótaröð Formúlu 1. Maldonado telur talsverðan mun á GP2 bíl og Formúlu 1 bíl, en hann ók samtals 190 hringi með liðunum tveimur sem hann prófaði með. Aðspurður í frétt á autosport.com hvort hann ætti meiri möguleika á keppnissæti núna sagðist hann ekki vita það, en taldi sig hafa skilað sínu, en hann ók með Hispania á þriðjudag, en á miðvikudag með Williams. "Þetta eru ólíkir bílar, en tvö fagleg lið. Það er meira niðurtog í Williams bílnum, þannig að hann er fljótari í beygjum og við hemlun, en vélin er sú sama og aflið því samskonar", sagði Maldonado um bílanna tvo. "Þetta er allt öðruvísi en í GP2, þar höfum við engan tíma til að gera neitt. Við höfum hálftíma til að æfa, hálftíma til að ná tíma í tímtökum og þrjú sett af dekkjum fyrir alla mótshelgina. Hérna (á Formúlu 1 æfingu) er hægt að bæta sig af því að það er lið að vinna fyrir þig í heilan dag og mörg sett af nýjum dekkjum til taks, þannig að ökumenn geta bætt sig. Ég tel að ég hafi gert vel og líður vel", sagði Maldonado eftir æfingadaginn með Williams í gær. Hann sagðist vita fljótlega hver staða hans yrði varðandi möguleika sína á sæti í Formúlu 1 varðaði.