Breytt Silverstone braut vígð í dag

Damon Hill, fyrrum meistari í Formúlu 1 og forseti breska kappakstursklúbbsins var meðal þeirra sem vígðu breytta og bætta Silverstone braut í Bretlandi í dag. Þá mætti hertoginn af York, Andrew prins en hann var gerður að heiðursfélaga í félagi breskra kappakstursökumanna, en akstursíþróttastarfsemi er mikilvægur þáttur í bresku efnahagslífi. Talið er að um 50.000 starfi beint á akstursíþróttum í Bretlandi. Silverstone brautin á að vera sú hraðasta brautin í Formúlu 1 eftir breytingarnar, en Monza á Ítalíu hefur til þessa verið sú hraðasta. Prófarnir í ökuhermum sýna þá niðurstöðu, en það kemur í ljós í kappakstrinum hvort rétt reynist eður ei. "Ég er djúpt snortin af vera gerður að heiðursfélaga, þó ég hafi enga hæfileika! Aðalástæðan fyrir því að ég er mættur hérna er sú að ég styð Silverstone og breska kappakstursklúbbinn er sú að hágæða tæknivinna sem við eigum í handraðanum er mikilvæg fyrir breskt efnahagslíf og akstursíþróttir eru hringjamiðjan. Með Formúlu 1 og Moto GP kappakstri getum við sýnt fram á hæfileika okkar", sagði Andrew á vígslu nýju brautarinnar. Mark Webber telur að ný útfærsla Silverstone brautarinnar muni henta Red Bull bílunum vel, en hann var meðal gesta í dag. "Okkar bíll er samkeppnisfær á öllum brautum, sem er gott fyrir okkur. Nýji hluti brautarinnar er með háhraðabeygju og líka með kafla sem krefst tæknilegs innsæis og þetta ætti að koma vel út. Ég er mjög ánægður að það tókst að halda Formúlu 1 í Bretlandi, eftir orðaskak við Bernie Ecclestone. En við ættum að vera stoltir að hafa bæði Formúlu 1 og Moto GP á sama stað", sagði Webber.