Skelltu sér á djammið með Jack Osbourne eftir tónleika

„Við vorum alveg rosalega stressaðar en náðum að yfirvinna það og njóta stundarinnar,“ segir Alma Guðmundsdóttir, söngkona úr The Charlies. Fyrstu kynningartónleikar (e. show case) íslensku söngkvennanna í The Charlies síðan þær sömdu við Holllywood Records voru í Los Angeles í fyrrakvöld.

Að sögn Ölmu voru áhorfendurnir ekki þeir auðveldustu í heiminum. Fólkið í salnum var bransafólk sem var ekki komið til að skemmta sér heldur til að mæla út hvert og eitt einasta smáatriði.

„Þetta voru hákarlarnir í bransanum, fólk frá umboðsskrifstofum og fyrirtækjum sem vildi sjá hvað hver hefði upp á að bjóða og hvort það væri eitthvað vitrænt,“ útskýrir Alma og bætir því við að þær hafi þó uppskorið klapp frá viðstöddum en slíkt er víst ekkert algilt á tónleikum sem þessum. Meðal fyrirtækja sem sækja atburði á borð við þennan má nefna Levi‘s, McDonald‘s, Nike, Apple og Playstation.

Stúlkurnar voru næstsíðastar á svið og fluttu meðal annars lagið Game Over. Þótt flestir í salnum hafi verið umboðsmenn þá mætti söngkonan Carmit, sem eitt sinn var meðlimur í hinum djarfa sönghópi Pussycat Dolls, til að hlýða á þær en The Charlies og Carmit eiga sameiginlega vinkonu.

Að sögn Ölmu fóru þær síðan aðeins út á lífið til að ná sér niður eftir hákarlaprófið og hittu meðal annars Jack Osbourne, son hins ódrepandi rokkara Ozzy Osbourne, sem Alma segir hafa verið ákaflega viðkunnanlegan.

Fjórir mánuðir eru liðnir síðan stúlkurnar fluttu út til Kaliforníu og Alma segir þær ekki vera komnar með vott af heimþrá.

„Auðvitað saknar maður fjölskyldunnar og vinanna en við erum gera eitthvað sem okkur hefur dreymt um og ég held að það sýni því allir skilning.“ Alma fær hins vegar að hitta fjölskylduna sína í næsta mánuði þegar bróðir hennar, Daði Guðmundsson, gengur í það heilaga í San Fransisco.

The Charlies taka að sjálfsögðu lagið. Næg verkefni eru síðan fram undan hjá sveitinni en þær eiga að fara í útvarpstúr um öll Bandaríkin í byrjun janúar á næsta ári. Þær munu þá þeytast um landið í flugvél og heimsækja stærstu útvarpsstöðvarnar til að kynna tónlistina sína.

Stúlkurnar ætla hins vegar að koma heim um jólin, vonandi í byrjun desember og Alma útilokar ekki að þær haldi litla tónleika hér heima.

freyrgigja@frettabladid.is