Enn bjarga skörðin - flóðið nær hámarki

Hlaupið er búið að ná að þjóðveginum og það er töluvert rennsli í gegnum skörðin sem voru rofin í veginn fyrsta daginn af Guðjóni Sveinssyni gröfumanni.

Mikið straumur fer í gegnum þau skörð núna að sögn Andra Ólafssonar, fréttamanns Stöðvar 2, sem er á vettvangi.

„Það er töluvert minna í þessu en í gær," sagði Andri en hann varð einnig vitni að því þegar flóðið féll niður í Markarfljót í hádeginu í gær. Hann lýsir flóðinu sem spýju sem vellur áfram.

Aðspurður hvort hann viti um stöðu varnagarðanna segist Andri hafa heyrt að varnagarðarnir í Fljótshlíð hafi gefið sig.

Andri segir ekki mikinn ofsa í flóðinu, „þetta hækkar hægt og rólega. Við erum búnir að fylgjast með þessu í 40 mínútur."

Markarfljótsbrúin stendur óskemmd enn þá.

Rýmingu er lokið og gekk vel samkvæmt sýslumanni.