Marca: Raúl á leiðinni til New York Red Bulls

Samkvæmt heimildum spænska dagblaðsins Marca er ókrýndur konungur Madrid-borgar, sjálfur Raúl González, að íhuga að ganga í raðir bandaríska MLS-félagsins New York Red Bulls fyrir næsta tímabil.

Hinn 32 ára gamli Raúl hefur verið í herbúðum Real Madrid síðan hann var 17 ára gamall og unnið alla titla sem í boði eru ásamt því að setja persónulega fjölmörg markamet hjá spænska félaginu en hann viðurkennir nú að hann sé að íhuga að breyta um umhverfi.

„Á fimmtán frábærum árum er ég búinn að vinna alla titla með Real Madrid en núna er ég farinn að spila minna hlutverk í liðinu og það er eitthvað sem getur verið erfitt að sætta sig við," segir Raúl en forráðamenn Red Bulls eru stórhuga og hafa ásamt Raúl einnig verið orðaðir við Thierry Henry og Paolo Maldini.