Webber jók forskotið í stigamótinu

Mark Webber er kominn með 14 stiga forskot í stigamóti Formúlu 1 ökumanna eftir að hafa náð öðru sæti í mótinu í Singapúr í dag. Webber er með 220 stig, Fernando Alonso og Sebastian Vettel 206, Lewis Hamilton 192 og Jenson Button 189. Þremur mótum er ólokið og hlutirnir líta vænlega út fyrir Webber, en eftir á að keppa í Suður Kóreu á nýrri braut, Brasilíu og Abu Dhabi. Staðan hefur breyst talsvert síðustu vikurnar í stigakeppninni. "Fyrir tveimur vikum var Lewis aðal keppinauturinn, síðan Fernando. Þetta breytist hratt, en mest er um vert að þetta er að skríða í rétta átt og ég þarf að halda þessu áfram", sagði Webber á fréttamannafundi. "Sebastian átti sigurinn skilinn í dag, vann sitt verk vel, en við höfum séð það að fimmenningarnir í titlslagnum geta allir unnið mót. Eða fjórir. Jenson hefur náð góðum mótum í rigningu, en þegar það er þurrt hafa hinir fjórir barist. Ég þarf að vinna sigur og ég get gert það. Það kæmi sér vel, en áreiðanleiki bílsins skiptir líka máli ásamt fjölda annarra þátta." Engin ökumannanna hafa ekið á næstu braut, sem er í Suður Kóreu, en um tíma var óljóst hvort keppnin færi fram. Framkvæmdir hafa tafist en FIA mun skoða brautina í vikunni hvað öryggi og búnað varðar.