Breskar flugstöðvar vilja opinbera aðstoð vegna gossins

Rekstraraðilar breskra flugstöðva hafa beðið stjórnvöld um aðstoð eftir að hafa tapað 80 milljónum sterlingspunda vegna röskunar á flugi sem varð vegna eldgossins í Eyjafjallajökli. Upphæðin samsvarar um 16 milljörðum íslenskra króna.

Með þessu fylgja þeir í fótspor stjórnenda flugfélaganna sem hafa þegar óskað eftir aðstoð frá hinu opinbera, annaðhvort í formi beinna peningagreiðslna eða breyttra reglna. Breska blaðið Telegraph segir að hagsmunasamtök flugstöðvarekenda telji að flugstöðvarnar hafi tapað um 12 milljónum sterlingspunda, um 2,4 milljörðum króna, hvern dag sem flugið var lamað. Það ástand varði í um það bil sex og hálfan dag.

Loka þurfti fjölmörgum verslunum og veitingastöðum í flugstöðvunum á meðan að flug lá niðri.