Vettel stefnir á sigur á Suzuka

Sebastian Vettel er fremstur á ráslínu á Suzuka brautinni á Red Bull, en kappaksturinn er í beinni útsendingu á Stöð 2 Sport kl. 05.30 í dag og verður endursýndur í hádeginu.

Vettel vann sama mót í fyrra.

Vettel telur bílinn henta vel á Suzuka brautina og ræsir annað árið í röð á fremsta rásstað.

"Það er nýlunda að tímataka og kappakstur sé á sama degi, þannig að þetta er erfiður dagur. En ég svaf vel í nótt og vonast eftir sama árangri og í fyrra", sagði Vettel á fréttamannafundi eftir tímatökuna sem var í nótt. Henni var aflýst í gær vegna veðurs.

"Bíllinn er frábær á brautinni og það föstudagsæfingarnar nýttust okkur vel. Ég er fullur sjálfstrausts fyrir kappaksturinn. Ræsingin ætti að ganga vel og ég er á hreinni hluta brautarinnar. Sjáum hvað gerist", sagði Vettel.